Што гэта было і чым сталася? У чым таямніца поспеху адзінага беларускага мюзіклу, які апявае залаты час міжваеннага беларускага памежжа?
З нагоды 20-цігоддзя «Народнага альбому» Сяргей Будкін і Яўген Шапчыц шукалі адказаў на гэтыя ды іншыя пытанні, у выніку паўстаў фільм з красамоўнаю назваю «Народны альбом»: Ненаўмысны шэдэўр», які ўчора ахвочыя змаглі пабачыць на вялікім экране ў сталічным кінатэатры «Мір».
Варшава, расейскія госці, габрэі, а перадусім – у альбоме і ў фільме – беларускае мястэчка Ракаў, населенае шматаблічнаю, шматвобразнаю, але такою беларускаю тутэйшасцю…
Паказ адбыўся ў межах фестывалю «Лістапад», у пазаконкурснай праграме. Затое, як на фестывалях і бывае, героі фільму ажылі ды сышлі з экранаў – ужо згаданы карчмар Аляксандр Памідораў, Аліцыя ды засцянковая лірычная гераіня Кася Камоцкая, аўтары фільму ды самога альбому.
Як адзначыў Сяргей Будкін, «стваральнікі найбольш хацелі, каб фільм найперш паглядзела моладзь, асабліва тыя, хто нічога не ведае пра ідэю «Народнага альбому». А пры ўсёй папулярнасці мюзіклу такія ў нашай краіне ёсць.
