Дамовіліся дамаўляцца. Што ў 28 «дарожных мапах»

Урад Расеі каротка апісаў 28 пагадненняў між Беларуссю і Расеяй. Калі верыць напісанаму, ні пра што канкрэтнае яшчэ няма дамоваў – толькі пагадненні пра нешта дамовіцца ў будучыні.

У Менску 10 верасня прайшло паседжанне савету міністраў «саюзнай дзяржавы» Беларусі і Расеі, на якім былі ўхваленыя «Асноўныя напрамкі рэалізацыі палажэнняў Дамовы аб стварэнні саюзнай дзяржавы на 2021–23 гады» і 28 «саюзных праграмаў» інтэграцыі, аб якіх днём раней дамовіліся Аляксандр Лукашэнка і Уладзімір Пуцін. Прэм’еры Беларусі і Расеі падпісалі адпаведную пастанову.

Урад Расеі апублікаваў апісанні тых праграмаў. З апісання бачна, што бакі дамовіліся ў будучыні «сінхранізаваць» і «гарманізаваць» законы і агульныя падыходы, заключыць новыя дамовы, распрацаваць новыя праграмы і тарыфы, «каардынаваць» цэнаўтварэнне.

Але нічога канкрэтнага, калі верыць напісанаму, яшчэ не прынялі, дамовы аб, напрыклад, цане на газ ці нафту няма, як няма і даты скасавання роўмінгу. Толькі ў некаторых пунктах пазначаныя даты, да якіх збіраюцца дамовіцца.

Напрамкі гэтых пагадненняў аб намеры дамовіцца такія:

1. Збліжэнне макраэканамічнай палітыкі.
2. Гарманізацыя грашова-крэдытнай палітыкі і макрапрудэнцыяльнага рэгулявання.
3. Гарманізацыя валютнага рэгулявання і валютнага кантролю.
4. Гарманізацыя патрабаванняў інфармацыйнай бяспецы ў фінансавай сферы.
5. Гарманізацыя нормаў рэгулявання фінансавых арганізацыяў, і фінансавага рынку агулам, у тым ліку забеспячэнне стварэння адзіных прынцыпаў страхавання ўкладаў.
6. Гарманізацыя патрабаванняў у галіне процідзеяння адмыванню грашовых сродкаў і фінансавага тэрарызму.
7. Інтэграцыя плацежных сістэмаў у галіне нацыянальных сістэмаў плацежных картак, сістэмаў перадачы фінансавых паведамленняў і разлікаў, укараненне міжнароднага стандарту фінансавых паведамленняў ISO 20022, сістэмы хуткіх плацяжоў, гарманізаваных падыходаў у галіне нагляду і назіранні за аплатнымі сістэмамі.
8. Гарманізацыя патрабаванняў у абароне правоў спажыўцоў фінансавых паслуг і інвестараў, а таксама прадухілення нядобрасумленных практыкаў на фінансавым рынку.
9. Інтэграцыя інфармацыйных сістэмаў дзяржаўных кантрольных органаў у наглядзе за тавараў.
10. Інтэграцыя інфармацыйных сістэмаў у маркіроўцы тавараў.
11. Гарманізацыя падатковага і мытнага заканадаўства і супрацы ў мытнай сферы.
12. Інтэграцыя інфармацыйных сістэмаў дзяржаўных кантрольных органаў у ветэрынарным і каранцінным фітасанітарным кантролі.
13. Інтэграцыя інфармацыйных сістэмаў транспартнага кантролю.
14. Уніфікацыя рэгулявання транспартнага рынку.
15. Фармаванне аб’яднанага рынку газу.
16. Фармаванне аб’яднаных рынкаў нафты і нафтапрадуктаў.
17. Фармаванне аб’яднанага рынку электрычнай энергіі.
18. Уніфікацыя заканадаўства ў эксплуатацыі аб’ектаў ядзернай энергетыкі.
19. Фармаванне адзінай аграрнай палітыкі.
20. Фармаванне адзінай прамысловай палітыкі.
21. Увядзенне адзіных правілаў доступу да дзяржаўнага заказу і дзяржаўных закупках.
22. Адзіныя правілы ў абароне правоў спажыўцоў.
23. Адзіныя правілы канкурэнцыі.
24. Уніфікацыя патрабаванняў да арганізацыі і ажыццяўлення гандлёвай дзейнасці.
25. Фармаванне адзіных прынцыпаў функцыянавання адзінага рынку сувязі і інфарматызацыі, скасаванне роўмінгу.
26. Уніфікацыя рэгулявання бухгалтарскага ўліку і складання фінансавай справаздачнасці.
27. Уніфікацыя заканадаўства ў турыстычнай дзейнасці.
28. Правядзенне ўзгодненай палітыкі ў сацыяльна-працоўнай сферы.

Чыноўнікі кажуць, пагрозы суверэнітэту няма

«Вядома, трэба фармаваць адзіную прастору на прынцыпах адкрытасці, празрыстасці і ўзаемнага даверу, на правілах, якія ўлічваюць інтарэсы і патрэбнасці жыхароў і прадпрымальнікаў, зразумела, пры поўным захаванні суверэнітэту нашых дзяржаваў», – перадае «Інтэрфакс» словы расейскага прэм’ер-міністра Міхаіла Мішусціна.

Пра суверэнітэт казаў і ягоны беларускі калега Раман Галоўчанка, прэм’ер ураду Лукашэнкі:

«Па сутнасці, урадамі дзвюх краінаў была праведзеная інвентарызацыя палажэнняў дамовы аб стварэнні «саюзнай дзяржавы». На гэтай аснове сфармаваны новы пералік задачаў у мэтах далейшага развіцця адносінаў пры безумоўным захаванні як палітычнага, так і эканамічнага суверэнітэту. Гэты адказ тым, хто займаецца палітычнымі спекуляцыямі на тэме інтэграцыі ў рамках Саюзнай дзяржавы».

Прэс-сакратар Пуціна Дзмітрый Пяскоў запэўніў, што інтэграцыя будзе «працягвацца ў тым выглядзе, які будзе найлепшым чынам адпавядаць інтарэсам дзвюх краінаў».

Аб адзінай валюце пакуль гаворка не ідзе, дадаў ён, а пытанне прызнання анексіі Расеяй украінскага Крыму не абмяркоўвалі.

АА belsat.eu