Як мы дакаціліся да таго, што адукацыя ператварылася ў яшчэ адную зброю «лукашыстаў»? На гэтую тэму ў студыі праграмы «Без акрэдытацыі» разважаюць яе аўтар, журналіст Зміцер Міцкевіч, экспертка ў галіне адукацыі Святлана Мацкевіч, а таксама выкладчык Лодзінскага ўніверсітэту Ян Маравіцкі.
«Кароткі шлях кар’ернага росту, які распачынаецца ў адукацыйным асяроддзі, калі з адукацыі можна трапіць ва ўладу, – ён ужо прысутнічаў у беларускай адукацыі», – сцвярджае Святлана Мацкевіч.
Людзі, якія ішлі такім шляхам, добра разумелі, што трэба праяўляць лаяльнасць, хітрасць, трэба ўступаць у пэўныя стасункі, якія загадзя забяспечваюць табе кар’ерны рост. У аснове гэтага шляху – пэўная ідэалогія. Не абавязкова добра вучыцца, патрэбныя іншыя якасці. Менавіта гэта сёння ўмацоўвае сістэму ўлады.
«Умова кар’еры – лаяльнасць уладам», – падтрымлівае суразмоўцу Ян Маравіцкі.
Дзяцей выхоўваюць такім чынам, каб яны ўсведамлялі, што адзіны шлях выбрацца наверх – быць паслухмяным рэжыму. Досвед Савецкага Саюзу паказаў, што супрацьстаяць гэтаму можна ў сям’і, – кажа госць студыі. – Сям’я і кола блізкіх асобаў павінна дапамагчы ўспрымаць крытычна тое, што дае афіцыйная школа».
Ці могуць беларусы стварыць сістэму адукацыі, паралельную дзяржаўнай? Ці замінае якаснай перадачы ведаў ідэалагічны кампанент? Наколькі шчыра настаўнікі падтрымваюць рэжым? Якая матывацыя ў педагогаў, якія фальсіфікуюць выбары? Адказы на гэтыя ды іншыя пытанні – глядзіце ў праграме.
Фота: president.gov.by
